യാത്രയ്ക്കായി ദിനംപ്രതി റോഡ് ഉപയോഗിക്കാത്തവർ ഇന്ന് ഉണ്ടാവില്ല, അതിൽ തന്നെയും സ്വയം വാഹനം ഓടിക്കുന്നവരാണ് ഭൂരിപക്ഷവും. അതിനാൽ തന്നെ റോഡുകളിൽ നമ്മുടെ പെരുമാറ്റം വളരെയേറെ പ്രധാനപ്പെട്ടത് തന്നെയാണ്. നമ്മളെ പോലെ മറ്റുള്ളവരും റോഡിൽ തുല്യ അവകാശമുള്ളവരാണ് എന്നും, അവർക്കും ഇങ്ങോട്ട് ലഭിക്കണം എന്ന് നമ്മൾ ഉദ്ദേശിക്കുന്ന അതേ മര്യാദ കൊടുക്കണം എന്നും നാം മനസ്സിലാക്കേണ്ടതാണ്. റോഡിൽ നമ്മൾ ചെയ്യുന്ന, നമുക്ക് നല്ലത് എന്ന് തോന്നുന്ന പല കാര്യങ്ങളും മറ്റുള്ളവർക്ക് ആരോജകമോ വിഷമിപ്പിക്കുന്നതോ ബുദ്ധിമുട്ടിപ്പിക്കുന്നതോ ആയിരിക്കും. അവയിൽ ഒന്നാണ് അനാവശ്യവും ആരോജകവും ആയ ഹോൺ മുഴക്കൽ. ഇത്തരം അശാസ്ത്രീയമായ ഹോണുകളെ കുറിച്ചും അവയെ തുടർച്ചയായി അനാവശ്യമായി ഉയയോഗിക്കുന്നതിനെ കുറിച്ചും പൊതുജനങ്ങളെ ബോധവൽക്കാരിക്കുന്നതിനായി കേരളാ പോലീസ് ഒരു കുറിപ്പ് പ്രസിദ്ധീകരിച്ചത് ഇപ്പോൾ വൈറൽ ആയിരിക്കുകയാണ്.
കേരളാ പോലീസിന്റെ കുറിപ്പ് ഇങ്ങനെ :
ബ്രെക്ക് ചവിട്ടുന്നതിലും എളുപ്പം ഹോൺ മുഴക്കുന്നതാണെന്ന് കരുതുന്നവരാണ് പല ഡ്രൈവർമാരും.
ഹോണ്‍ നീട്ടിമുഴക്കിയില്ലെങ്കില്‍ എന്തോ കുറവു പോലെയാണവർക്ക്. ട്രാഫിക് സിഗ്‌നൽ കാത്തു കിടക്കുന്നവർ, റയിൽവെ ഗേറ്റിൽ, ട്രാഫിക് ബ്ലോക്കിൽ കാത്തുകിടക്കുന്ന വാഹനങ്ങൾ എന്നിവയെ കടത്തിവിട്ടാലേ മുന്നോട്ട് പോകാൻ കഴിയൂ. അതുറപ്പാക്കിയിട്ടും അനാവശ്യമായി ഹോൺ മുഴക്കുന്ന ഡ്രൈവർമാരെയും നാം കാണാറുണ്ട്.
അടിയന്തിര സാഹചര്യങ്ങളിൽ മുന്നറിയിപ്പ് നൽകുന്നതിനാണ് ഹോൺ ഉപയോഗിക്കേണ്ടത് എന്നാൽ ഇതിനു വിപരീതമായി ദേഷ്യം, നിരാശ, അക്ഷമ എന്നിവ പ്രകടിപ്പിക്കാൻ ചിലർ തുടർച്ചയായി ഹോൺ മുഴക്കുന്നു. തുടർച്ചയായി മുഴങ്ങുന്ന ഹോൺ മൂലം വാഹനമോടിക്കുന്ന പ്രായമുള്ളവരിൽ പെട്ടെന്ന് എന്ത് ചെയ്യണം എന്ന ആശയക്കുഴപ്പം ഉണ്ടാകുന്നു. അത് അപകട സാധ്യത കൂട്ടുന്നു. ശബ്ദ മലിനീകരണത്തിന്റെ പ്രധാന ഉറവിടമാണ് നിരന്തരമായ ഹോൺ ഉപയോഗം. ഇത് ഒരു ശല്യത്തേക്കാൾ ഇത് ഗർഭസ്ഥ ശിശുക്കൾ മുതൽ മുതിർന്നവർക്ക് വരെ ആരോഗ്യത്തിന് ഹാനികരമായ കാര്യം കൂടിയാണ് പ്രത്യേകിച്ച് എയർ ഹോണും ശബ്ദപരിധി പാലിക്കാത്തവയും. സാവധാനത്തിൽ കേൾവി ശക്തി നഷ്ടപ്പെടുകയാണ് അമിത ശബ്ദം സ്ഥിരമായി കേൾക്കുന്നതിന്റെ ദൂഷ്യഫലം. ദീർഘ നേരം അമിത ഹോൺ ചെവിയിൽ മുഴങ്ങുന്നതു പെട്ടെന്നു തീരുമാനമെടുക്കാനുള്ള ശേഷിയേയും ബാധിക്കും. ഇതു അപകടം ഉണ്ടാക്കാനും കാരണമായേക്കാം.
മറ്റ് റോഡ് ഉപയോക്താക്കൾക്കോ അല്ലെങ്കിൽ വാഹനം ഓടിക്കുന്ന നമ്മൾക്ക് തന്നെയോ ഒരു അപകടം സംഭവിക്കാവുന്ന സന്ദർഭം ഉണ്ടെങ്കിൽ മാത്രം ഹോൺ മുഴക്കുക.
മോട്ടോർ വാഹന നിയമം സെക്ഷൻ 194F പ്രകാരം താഴെ പറയും പ്രകാരം ഹോൺ മുഴക്കുന്നത് കുറ്റകരമാണ്:
1. അനാവശ്യമായും / തുടർച്ചയായും / ആവശ്യത്തിലധികമായും ഹോൺ മുഴക്കുന്നത്.
2. നോ ഹോൺ (No Horn) എന്ന സൈൻ ബോർഡ് വെച്ച ഇടങ്ങളിൽ ഹോൺ മുഴക്കുന്നത്.
ഇത്തരം പ്രവർത്തി ചെയ്യുന്നവരിൽ നിന്ന് 1000 രൂപ പിഴയായി ഈടാക്കും. കുറ്റം ആവർത്തിച്ചാൽ 2000 രൂപ.
#keralapolice
